- 021 -
1505 (19. kwietnia) Actum & datum w sobotę po niedzieli Jubilate etc.
Porozumienie zawarte pomiędzy książętami, szlachtą i miastami w sprawie bicia nowego grosza i halerza.
— Wir von gotts gnaden Sigmundt kunigliches stammes ausz Polan hertczog in Slezien zu Troppaw Grossenglogaw etc. baider Slezien und Lawsitz oberster stadthelder, Johannes bisschoff zu Breslaw, Kazimir zu Tesschen, Johannes zu Oppoln, Friedrich und Georg zu Liegnitz Brieg etc. gebruder, Albrecht und Karll zu Munsterberg Olssen etc. grafen zu Glaetz, Niclas Johanns und Valentinus von Troppaw zu Ratibor hertczogen, ratmanne der stat Breslaw, ritterschafft manschafft und stete der furstenthum Sweidnitz und Jawer bekennen offentlich mit diesem brive vor meniglich. Nachdem in dieser Slezien manicherley irthumb und beswerunge an der muntze befunden, dadurch alle stende, gaistlich und werltlich, arm und reich, hochlichen beswert gewesen, deme furzukomen und eine bequeme muntze, die sich mehr wen die forige mit den muntzen umbligender lande vergleichn mochte, auffzusetzn, haben wir ausz sonderlicher bewillunge und zulossen der kuniglichn maiestet zu Hungern Behemen etc. unsers allergnadigsten hern uns einer newn muntze an grosschen und hällern zu slaehen voreniget und also unverbruchlicher zu halden bewilliget und vorsprochen, dieser nachfulgender maszen, das diese itzigen ganghafftigen grosschen und häller also bei irer wierde bleiben und von meniglichen unveruffen und unverslagen sollen genomen werden, danach man alle pfenwerdt an essender und trinkender wareTzw. Pfennigwerthe, codzienny, niewielki zakup, sprzedaż., darzu an allem speiskauff kauffen und verkauffen sall, damitte das armuth durch die newe muntzen nicht beswert werde, aber alle frembde und auszlendische hällr, die in der Slezien von uns fursten und andern, so recht haben zu muntzen, nicht geslagen seindt, sollen verrufft und verpoten werden, der auf Johannis negstkomend furden nicht zu nehmen nach auszzugeben bei swerer atraff. Und wer ausz uns grosschen zu slaen zu rechte hat, sol der sechsunddreissig grosschen an der tzal vor einen Hungrischen gulden alaen lassen, der auff eine Breslische margk am schrote gehen sollen newntzig grosschen und halden sex lot feines silbrs. Derselben grosschen einer sal gelden der ietztigen alden häller zwentzig und zwölff Troppische häller. Wer aber ausz uns nicht groschen sonder häller zu rechte zu slaen hat, soll der vor einen gulden Hungrisch sechsunddreissig schilling hällr slaen lassen, zwölff häller zu einen schilling gerechnet, der auff eine Breslissche margk am schrote gehen sollen sechsundfumfftzig schilling häller und halden vierdehalb lot feines silbers. Derselben häller sollen tzwelff einen newhen weiszen grosschen gelden und yder derselben häller sol gelden gleich einem Troppischen Teschinischen und Ratiborisschen häller, desgleichen einem Gorlitzschn pfennige. Sollen sich auch mit den ietztigen alden hällern dermaszen vergleichen, das drei newhe häller gelden sollen fumf alde häller und so furder sechs newhe tzehn alde häller und zwölff newhe zwentzig alde häller. Sondern die Behemischen die Polnisschen und die alden Breslisschen grosschen sollen gehen neben den newhn grosschen, also das ein ietzlichr bei sich selben wissen wirt, wie die zu nehmen sein, damitte er auch die widderumb ane schaden alse verthuen magk. Man soll auch in allen steten auszruffen und gebieten laszen bei deme fewre, das nymands alde häller nach alde Breslissche grosschen vergieszen ader verprennen sall. Es sall auch ein yder ausz uns, der wirt muntzen laszen wie obgemelt, einen geswornen probirer halden, der seiner herschafft und dem gantzen lande sweren sall sich recht und auffrichtig zu halden. Daruber sall zu Breslaw ein gemeiner probirer gehalden werden, der uns allen und deme gantzen lande swern sal, auff alle newhe muntze gutte und vleiszige achtunge zu haben, das keiner muntzen hinfurder am schrote nach am korne wes abgeprochen werde. Wurd aber derselb gemeiner probirer aber der andern irkeiner befunden, das die muntze wie oberurt am schrote adder korne nicht recht were, soll im darumbis widderfarer als einem felscher, damit diese muntze fur und fur bestendig pleibe und nicht verendert werde. Es sall sich auch ein yder verkauffer alhie in Slezien durch diese newhe muntze bezcalen laszen bei vorluste seiner ware. Sonnder die erblichn zinse wirt ein ietzlicher wiszen wie von seinen armen leuten ze furdern, daran er inen wirt muszen vernemen nach gelegenhait der tzeit. Aber die zinse zu widderkauft wirt man nehmen und geben muszen wie itzunder mit alden hällern die ietzunder gehen, zwölf hällr fur einen grosschen gerechnet, und ein jar also bestehen laszen, danach wirt man befienden wie sich die muntze schigken will, alsdann wir alle eines werden, weise und wege finden wollen, das meniglich gaistlichs und werntlichs stands träglich sein wirt, aber in mitteler zceit sollen die wie itzunder gerechte und vergulden werden. Zw urkund haben wir obgenante herzogen ritterschafft manschafft und stete unsere ingesigell hieran hengen laszen.
Gescheen und geben am sunabendte nach Jubilate nach der geburt Christi unsers hern fumfftzehnhundert im fumfften iaren.